Vawiin khan PWD Minister Pu Vanlalhlana chuan Ngopa Vantlang Khelmual tihchangtlunna hnathawh zawh tawh (Upgradation of Sports Infrastructure of Ngopa Playground) chu khuallian niin a hawng a, P&E Minister, Lengteng Bialtu MLA, Pu F. Rodingliana chu khual zahawm a ni.
He hunah hian khuallian Pu Vanlalhlana chuan chuan thu sawiin ram mawi tak chawi vel leh boruak zo nuam tak kara Ngopa khua awm chu vannei a tih thu sawiin Ngopa Playground tihchangtlunna hun tiam aia hmaa hnathawktu leh contractor ten an zo thei chu lawmawm a tih thu a sawi a, sawrkar pawhina chak taka hma a lak rah a ni, a ti.
Khuallian chuan kalphung thar awmzia sawiin, kan thil tih țhin kan ram tana țha lo chu kha deuh mahse tih luih a ngai tih a sawi a, a theih chin chinah sawrkar chuan inrenchemna kalpuiin, MLA te pawhin eiru lo tura an intiam vek a nj, a ti.
Minister chuan tunah hian India ram chu State puitling zingah corrupt lo ber State a ni hial tawh, a ti a, hnathawktute hnathawh endik turin sawrkar chuan Monitoring Committee din a ni a, hnathawk țha lo lakah chuan action an la hmak hmak thin a ni, a ti bawk. Sawrkar chuan kum hnih chhungin ram leh mipui tan hna nasa takin an thawh tawh thu a tarlang bawk a ni.
Khualzahawm, P&E Minister Pu F Rodingliana pawhin thu sawiin Ngopa-in khelmual changtlung zawk a neih theihna tura tha thawhtu zawng zawngte chungah lawmthu a sawi a, Sawrkar thawhpui kawngah Ngopa mipuite chu sawmin Aspirational Block ațanga an chhuah thuai a beisei thu a sawi a ni.
Er.Hrangthanga Zote Chief Engineer, PWD Building & Other Deptt Mizoram chuan Khelmual tihchangtlunna kawnga hmalakna report tlangpui a pe a, Ngopa khawtlang leh GSA hruaitute țawiawmna țha tak avangin lawmthu a sawi.
Vawiina Ngopa Khelmual tih changtlun hawn tak hi North Eastern Council ațanga sum hmuh cheng nuai 400 senga thawh niin, Stadium hualin mi 3,000 thut theihna kâng (Gallery) hmun thumah siam a ni a, Pavillion changtlung tak awmin thlang lamah retaining wall țha taka dawl a ni bawk.
