Vawiin khan Directorate of ICT Conference Room-ah Minister Dr Vanlalthlana kaihhruainain ICT Department review meeting neih a ni. Meeting-ah hian ICT Department hnuaia Secretariat leh Directorate officer-te an tel a. Kum hnih chhunga Department hma lakna hrang hrang tarlan niin hma chhawp awmte sawi ho a ni.
ICT Department hma lakna hnuaiah hian Mizo Fiber Grid project hnuaiah Mizorama district leh block headquarters hrang hrangte chu internet hrui hmanga thlun zawm a ni a. Secretariat office-ah file zawng zawng hi e-office hmanga kalpui a ni tawh a. Directorate leh District office-ah kalpui tum mek niin, ICT Directorate chuan he e-office hi an hmang tawh a ni.
Artificial Intelligence hmanga Mizo ṭawng humhalhna tur leh ṭawng lehlinna project Bhashini hmalakna kal mek bakah office data hlui vawn ṭhatna ‘Digitization of Legacy Data’ kalpui mek a ni a. ICT Department leh an hnuaia Mizoram State e-Governance Society (MSeGS) siam software leh mobile app hrang hrangte thlirho a ni. Telcommunication lama hma lakna hrang hrangte pawh thlirho niin hmasawnna tam tak a awm thu ngaihthlak a ni.
ICT Department hian basic computer skills leh website bakah Artificial Intelligence lamah sawrkar hnathawkte tan training a buatsaih ṭhin a. IT leh cyber crime chungchang awareness pawh khaw hrang hrangah a nei ṭhin a ni.
Meeting-ah hian project kal lai mek zawh vat a nih theihnan hun bituk siam niin, hmalakna kal meka harsatna hrang hrangte chin fel dan tur sawiho a ni a. Data policy leh data security ṭha zawk neih tuma hma lak a ṭul thu sawiho niin, sawrkar aṭanga khua leh tui hnena service (government to citizen service) awlsam zawka pek a nih theihnan ruahmanna siam ni se tih a ni.
Hmalakna tur hrang hrang zingah hian Center for Excellence for AI neih a ṭhat thu leh neih theih dan turte sawi ho niin, neih theih a nih ngei theih nan chak taka hmalak zel ṭha tih a ni bawk.
