Assam Regiment Young Officer (commissioned officer chhuak thar) pakua te chuan vawiin khan Lunglei tlawhin, Lunglei District Sainik Office-ah District Sainik Welfare & Resettlement Officer (DSW&RO) Maj. Rebecca L. Chhakchhuak (Retd) an kawm.
Lunglei DSW&RO Maj. Rebecca L. Chhakchhuak (Retd) chuan Sainik Office hna thawh dan bakah, Mizo hnam ziarang leh nunphung te, Ex-servicemen chungchang te a lo hrilhfiah a. Mizo sipaia lut tam ber chu Assam Regiment-ah an luh avangin an hnuaiah Mizo sipai an tam dawn tih hrilhin, hnam hrang hrang kara hna thawh dan leh hotu ṭha an nih theih nana fuihna hrang hrangte a fah bawk.
Assam Regiment officer tharte hian Mizoram chanchin leh hriat duh an neih hrang hrangte zawtin, thil hrang hrang an sawi ho va. Maj. Rebecca chuan inlawmna thilpek atan Mizoram calendar a pe ṭheuh a ni.
Assam Regiment Young Officer-te hian Lunglei leh a chhehvela hmun pawimawh hrang hrangte an fang kual bawk a. Lunglei Chanmari-a ram tana martarte hriat rengna lungphun, War Memorial Lunglei pawh tlawhin, Lunglei DSW&RO Maj. Rebecca chuan War Memorial hlutna leh pawimawhna te a hrilhfiah bawk.
