Vawiin khan Third Battalion MAP Ground Mualpuiah Grassroot Cricket School Tournament kharna hun hman a ni a. School Education Minister Dr Vanlalthlana’n khuallian niin he hun hi a hmanpui.
School Education Minister chuan thusawiin Zirlaite chu tumruhna nen an hma lam khawvel hmachhawn tur te, harsatna karah pawh tlawm mai lova hlawhtlinna thawk chhuak thei turin a chah. India ram cricket-a an lan chuan khawvel huapah an lang nghal tih a hrilh a, Cricket Association of Mizoram te nen kum 5 chhung thawhhona neih a nih chhungin thil tha tam tak an hmuh thu a sawi. Zirlaite chu cricket khelh bansan mai lova, a bulthut thiamna nei tura chhunzawm zel tur te, zirna pangngai thlahthlam lova ngai pawimawh zel turin a chah bawk.
He tournament-ah hian Aizawl khawpui chhunga School 10 atangin boys & Girls team an tel a, Serchhip District atangin Govt Midland School Serchhip Boys team an tel bawk.
He tournament-ah hian Girls-ah Govt Nepali Middle School an champion a, Govt Bethlehem Middle school chu runner up an ni. Boys-ah Govt Midland Comprehensive School Serchhip an champion a, Govt Chhinga veng Middle school chu runner up an ni.
Mimal khel thate hnenah lawmman pek an ni bawk a. Girls-ah Best Bowler Urmila Begum Govt Nepali Middle School Khatla, Best Batter-ah Lalnunmawii Govt Nepali Middle School Khatla, Player of the tournament-ah Lalnunmawii Govt Nepali Middle School Khatla thlan a ni bawk.
Boys-ah Best Bowler atan Ngurthantluanga Govt Chhinga Veng Middle School, Best Batter-ah Rodinngheta Govt Chhinga Veng Middle School, Player of the tournament-ah Mangliana Govt Midland Comprehensive School te thlan an ni bawk.
Grassroot Cricket School atan hian Cricket Association of Mizoram (CAM) leh Samagra Shiksha Mizoram te chuan April 12, 2022 khan thawhhona thuthlung an ziak a, Cricket zirna atana mamawh zawng zawngte CAM-in an tum vek a, zirlai leh school lama buaipui ngai awm apiang Samagra Shiksha ten an buaipui a ni. Cricket zirna atan hian Aizawl khawpui chhung Middle School 10 leh Aizawl pawn District pathumah school Pakhat theuh thlan an ni.
