Vawiin khan Mualpheng Community Hall-ah, Sericulture department leh Mizoram KVI Board tangkawp hmalakna Mualpheng leh Keifang ram behchhan Muga Silk Project chu Prof. Lalnilawma, Minister of State, Tawi bialtu MLA ni bawk chuan a hawng.
He hunah hian Minister Prof. Lalnilawma chuan thu a sawi a, India ramin zalenna a neih atanga kum 100-na, 2047-ah India ram chu khawvela ram changkang (developed country)-a inhlang kai pha tura hmalakna “Viksit Bharat” chu kalpui mek a ni, a ti a, Sawrkar pawhin hemi tur hian theih tawp a chhuah avangin he project pawh hi lak thu tak a tul a ni, a ti.
Khawvel sik leh sa inthlak danglam karah Mizoram chu kan vannei hle tih a sawi a, Assam ram chauha awm thin Muga siamtu phengphehlep te chuan sik leh sa vangin Mizoram an pan a, hei hi keinin kan hman tangkai thiam a tul a ni, a ti bawk. Sawrkar hmalakna ringhlel tam tak an awm thin tih sawiin, sawrkar chuan Banakaih policy hmangin a thawhpui tur progress partner te a thlang chhuak a, he project hlawhtlinna pawh hi progress partner te kutah a awm a ni, a ti. Minister chuan ram hman phalsaktu Keifang leh Mualpheng VC te chungah lawmthu a sawi a, progress partner te chu theih tawp chhuah turin a sawm nghal bawk a ni.
Muga Silk pangang hi gold rawng mawi tak a ni a, thawmhnaw mawi tak tak siam nan thman thin a ni. Muga pangang khawi tur hian Banakaih scheme hnuaiah progress partner Mualphengah mi 25 leh Keifangah mi 16, a vaiin mi 41 thlan chhuah an ni.
Vawiin Muga Silk Project hawnna inkhawm hi Pu B. Lalchhuana, Joint. Director, Sericulture dept chuan a kai hruai a, Rev. Lalmuanpuia, Mualpheng Bialtu Pastor (PCI) chuan hunserh a hmang. RD Minister Prof. Lalnilawma chuan thu a sawi a, Pu C. Lalremliana, Chairman, MKVIB chuan project chungchang sawizauna hun hmangin, Pu Lalrinawma, Director, Sericulture dept hnen atangin technical report ngaihthlak a ni bawk. Pu A. Vanlalliana, District Sericulture Officer, Saitual chuan lawmthu sawinain hun a khar a ni.
