Vawiin khan ATI Auditorium MINECO, Aizawl-ah Conference on Key Child Rights Issues neih a ni a, School Education Department hnuaiah thawktute pualin naupangte himna leh an dikna chanvo chi hrang hrang zirho a ni.
School Education Secretary Pu David Lalthantluanga chuan he hunah hian thusawiin naupangte dikna leh himna hi zirna Inah hian kenkawh ngei ngai a nih thu a sawi a. Sorkar hian rules te, instruction te, guidelines te siam thin mahse, a field-a tihhlawhtlin hi a pawimawh lai tak a ni a ti a. Juvenile Justice Act leh POCSO Act te hi zirna in hrang hrangten hriatchian a pawimawh thu te, school leh a chhehvel hi Zirlaite tan hmun him ni tura vawn a pawimawh thu te a sawi.
School Education Director Pi Angela Zothanpuii pawhin kalkhawmte lawm paha thusawiin naupangte chungah thil fello leh tha lo tam tak a thleng thei a, hengah hian dan leh dun hmangin engtinnge kan humhim ang tih hriat a ngai a. Naupangte himna mai bakah tawhsual an tawhin engtia hmalak tur nge tih te hriat a ngai a, zirtir mai bakah naupangte venhim hi sikula thawkte tih tur a nih thu a sawi bawk.
Pu Jimmy Laltlanmawia Chairperson MSCPCR pawhin thusawiin naupangte hi an hmalam hun ringawt ngaihtuah lovin tuna an dinhmun mek hi ngaihtuah ngai a ni a ti a. School te himna an zirchiannaah sorkar sikulte chu average chunglamah an awm a, a lawmawm hle. School thenkhatte chuan naupangte right hi ngaih pawimawhah an nei lo. Pathianin mihring a siam a, mi pangngai leh dinhmun pangngaia ding thei tura siamtu chu zirtirtute an ni a ti bawk.
Naupangte dikna leh himna chanvo zirhonaah hian Pi F.Laltlansangi Civil Judge te, Pi Amy Lalrinpuii Principal Programme Manager WCD te, Pi PC Liansiampuii Additional SP CID (Crime) te, Pi Zozikpuii Lecturer SCERT leh Pi Caroline Rinthanpuii Fanai SDEO E&W School Education ten kalkhawmte an zirtir a. He zirhonaah hian naupangten an zia an thlakin ngaihthah loh tur, kawm chian tur a ni a, khawih chhiat an nih chuan an kekawrte leh thawmhnaw te su fai mai lova vawnthat tur a nih thu te, naupang thiltisual chu Juvenile Justice Board hmaah hruai tur a nih thu te sawi a ni a. Naupangte an chhungte leh an bul hnaia awmten mihring hmanga sumdawnnaa an hralh dan leh an nawr luih dan te, Zirna ina thawkte hriat tur chi hrang hrang mithiamte hian an sawi a ni.
