Mizorama ruihhlo dona kalpui dan thlirletna hun leh kalpui chhunzawm dan tur relin thutkhawmna neih a ni a. Pu Lalduhoma, Chief Minister chuan thutkhawm hi kaihruaiin Pu K. Sapdanga, Home Minister leh Pu Lalnghinglova Hmar, Minister, Excise & Narcotic Department-te bakah Secretary, Excise & Narcotics Department, Secretary, Home Department, IGP (HQ/L&O), Excise Commissioner, SP Narcotics, Central YMA President-te an tel a. Excise & Narcotics Department leh Home Department-a hotute leh Central YMA hruaitute an tel bawk a ni.
Chief Minister Pu Lalduhoma chuan ruihhlo do kawnga chak zawka hmalak a nih theih nan Mizoram sawrkar chuan December 2024 khan Saitual, Khawzawl leh Hnahthialah Excise & Narcotics Station a hawn thu te, rel luhna Sairang leh Bairabi ah Excise station hawn phalna peihfel a nih bakah March ni 14, 2025 khan Excise & Narcotics department-a thawktute chetvelna tur lirthei 18 lei a nih bakah indaih lohna zualpui phuhruk nan Mizoram Sawrkar atangin LMV pathum ruahman a nih thu a tarlang bawk a ni. Chief Minister chuan Excise & Narcotics Department-a thawktute indaihna phuhruk nan Post 16 siam thar a nih thu sawiin Direct recruitment hmangin mi 28 lak an nih tawh bakah mi 39 la leh turin inbuatsaihna a kal mek thu a sawi a. Kum 2025 chhung khan ruih theih thil chi hrang hrang kaihhnawih ah case 319 ziah luh a nih thu a sawi.
Pu Lalduhoma chuan ruihhlo chu hnam hmelma lian ber a nih angin a do kawngah pawh Sawrkar leh khawtlang tanrual a pawimawh thu a sawi a. Mizorama ruihhlo lo lute dan chah a nih theih nan Home Department, Excise & Narcotics leh Central YMA-te tangkawp chuan, September ni 1, 2025 khan ramri hrul khaw 22-ah Operation Jerico kalpui a nih thu a sawi a. September ni 1, 2025 leh January ni 13, 2026 chhunga ruihhlo man tawh zat hlut zawng chu Cheng Vbc. 196.42 a nih thu a sawi bawk a ni.
