Vawiin khan Chief Minister Pu Lalduhoma chuan a office-ah Mizo Language Development Board hnuaia din Eight Schedules Study Group te a kawm a, an hmalaknate a thlirpui. Study Group hian an report an la thehlut chiah lova, thehluh theihin an peih thawkhat tawh a ni.
Hun reilote chhunga hmalakna tha tak an lo kalpui avangin Chief Minister hian MLDB te chungah lawmthu a lo hrilh a. A umzui zel dan tur an rawtnate pawh tha a tih thu hrilhin bawhzui a nih tur thu a lo hrilh.
Eight Schedules Study Group te hian Mizorama pawl leh hnam pual hrang hrangte kawm kualin Eight Schedules-a Mizo tawng thun chungchanga an ngaihdante a zawt kual a. An kawm tawh zawng zawngten Mizo tawng eight schedules-a dah hi tha an ti tlang hle a ni, an ti.
Mizoram hian tunhmain dilna a lo thehlut tawh tih an tarlang a, umzuina engmah a awm lo thung a. Study Group te hian Task Group dina, dilna hi a thara thehluh a, chak taka bawhzui thaa an ngaihthu an thlen a ni.
Mizo tawng hi kum 1974 kha state official language a puan a ni tawh a, khawvel ram hrang hranga awm Zo hnahthlak zawng zawngte inbiakpawhna a ni a, Sahitya Academy chuan regional language-ah a pawm a, zirna lamah PhD thlenga zir theih a ni.
Peoples Linguistic Survey of India chuan Mizo tawng chu tawng thang chho mek a nih thu a sawi a, UNESCO chuan khawvela tawng him a thliar hran zingah a him ber dawttu ‘Vulnerable’ huangah a dah a, census hnuhnung ber 2011 data-in a tarlan danin India ram state 26 ah leh UT 7 ah Mizo tawng hmang an cheng a, chhiarpui tharah chuan state zawng zawng a huam tawh ngei rin a ni. Mizorama Mizo tawng hmangtu zat hi 2011 chhiarpuiah mi 8,30,846 an ni a, chhiarpui tharah nasa taka a pun rin a ni. Zirtu thenkhat chuan tunah hian khawvel pumah Mizo tawng hmangtu hi 2.2 Million (nuai sawmhnih pahnih) chuang an awm tawh niin an ngai.
Google translate chuan kum 2022 May ni 11 atang khan Mizo tawng chu tawng danga lehlin theihin a dah tan a. Hemi tum hian Google hian khawvela tawng chi hrang 1745 an zirchian zingah tawng 24 chu google translate-a dah turin an thlang a. Mizo tawng hi a tel pha a ni.
Mizo Language Development Board atang hian Chairman Pu R. Lallianzuala leh Pu Lalsangpuia, Secretary bakah Dr. Zoramdinthara leh Dr. H. Laldinmawia, Member, 8th Schedules Study Group te an tel a ni.
